رئيس مجلس الإدارة : عبدالمحسن سلامة
رئيس التحرير : خالد فؤاد حبيب

اعمل update لحياتك

16 ديسمبر 2018
داليا زردق

بنعمل طول الوقت update لموبايلاتنا و العابنا و برامجنا و شغلنا .....


بنحدث صفحاتنا الإلكترونية و مدوناتنا و كل ما هو حديث ...

بس بنتجاهل أرواحنا و قلوبنا و حياتنا الي محتاجه update الف مرة قبل كل دول .....

تحديث لمشاعرك ....ازاي تعبر احسن ازاي تغير صفاتك السيئه بصفات تانيه أحلي...

ازاي تغير مودك من حزين و كئيب لانسان متفائل و مرتاح البال و مطمن ....

ازاي تحب الناس و تبطل تنتقد و تذم و تغتاب و تشتم و تعايب و تجرح....

ازاي تغير شكلك و لبسك ...تلبس لون جديد تاكل شيء غريب تخرج مكان عمرك ما رحته ...

تتصل بصحاب قدام ...تزور قرايب عزاز ....تتعلم لغه او هوايه ...

تغير عاداتك .....تفكر في حاجات مختلفه ....تصلي كتير..
تسجد علي طول...

تقرا كتاب ربنا و تقرر انك تستفيد منه و تنفذه ...

تعمل   restart  لحياتك الي فاتت و تنساها لو كانت مش عاجباك ...

تجدد أولوياتك يمكن يكون جد جديد و لازم تعيد ترتيبها...

تحافظ علي نفسك ...ايوة قرر انك حتحافظ علي نفسك و حتخاف علي نفسك لانك لو مش حبيت نفسك مش حتحب حد ...

فاقد الشيء لا يعطيه ....حاول تكون مرتب افكارك و منظم أمورك عشان تنجز و تحقق بدل ما تشتكي و تستسلم لليأس...

قوم و اتحرك القاعده بتقتل الروح و الهمه و الأمل...

أرض الله واسعه و رحمته اوسع ..

يالا نعمل update لكل أحلامنا و نقرر اننا حنبتدي ننفذها حلم ورا حلم .....

لو فضلنا ماشيين ورا تيار الكلام الحزين والأغاني الغم و العبارات الرنانه عن الظلم و العذاب و الألم يبقي إحنا كده بننتحر....

النهاردة إنت لسه عايش ....بلاش تنسي ده و الحق نفسك....

فليرحمنا الله جميعا....

الاكثر قراءة