رئيس مجلس الإدارة : عبدالمحسن سلامة
رئيس التحرير : خالد فؤاد حبيب

ليه المتجوز مرشوش عليه سكر؟

5 نوفمبر 2018
أمنية كمال

كام مرة قابلنا قصة البنت الحلوة اللي سابت كل اللي حواليها ولا اللي بيتقدموا لها وحطت عينها على راجل متجوز؟؟ وترضى تعيش مع نص راجل بتاخد اقل من اللي تستحقه في كل حاجة اهتمام واحترام ووقت ، موقف غريب جدا جدا بس خلينا نسأل الأول ايه مميزات الراجل المتجوز اللي تخلي بنوتة صغنتوتة تسيب كل رجالة البلد وتتشد له، الحقيقة كلها تكهنات من سيدات متزوجات تعرضوا للموقف ده، 

ومقدرتش اتوصل لإجابة منطقية من البنات نفسهم غير "بحبه يا بابا بحبه" هل فعلا ده حب وهل ممكن البنات متتشدش لراجل الا بعد ما يتجوز؟ الحقيقة اني شوفت على جروب من جروبات الفيسبوك مشكلة كتبتها بنت باسم مستعار عن نفس الحدوتة، قابلت شاب حبها لكن مقدرتش تحبه وانفصلوا قبل ما يرتبطوا اساسا وراح خطب وهي برضو مكملة حياتها ومش عايزاه، عرض عليها يسيب خطيبته ويرجعوا لبعض موافقتش فالراجل كمان كمل حياته واتجوز

بعدها رجع يعرض عليها يطلق مراته وكأنها لعبة المرة دي بأه الراجل الوحش بأه جذاب فجأة وحلو وكريم كراميل  واه عايزة ترجع له طب ليه؟ أكيد الشيطان محلي اللعبة في عيونها لكن ايه المبرر اللي ممكن يخلي بنت تسيب الراجل السنجل وتحب المتجوز؟؟

في بنات بتحب حس المغامرة والاثارة المقابلات السرية والاكشن ده بالنسبة لها دي متعة والعلاقات الطبيعية بالنسبة لهم مملة وروتينية، وفي بنات بتحب تمتلك مساحات شخصية واسعة شوية فطبيعي الراجل المتجوز مش هيكون فاضي لفكرة انتي فين ومع مين وروحتي امتي، وفي بنات بتحب فكرة التحدي الفكرة الشيطانية بتاعت ما تيجي نراهن هخليه يسيب بيته وعياله ويجيلي انا، وفيه اللي عايزة تثبت لنفسها أنها أحلى من مراته ودي بتكون عندها غيرة مسبقة من مراته وناوية تكيدها وخلاص وممكن بعدين متكملش في العلاقة دي، وفي بنات بتعجب بحب ووفاء زوج لزوجته فبتبقى عايزة من ده وكل ما كان الزوج مخلص لمراته مستوى اللعبة بيكون أصعب والحكاية تحلو وفي بنات بتشوف الراجل المتجوز حتى لو من نفس سنها انه كبير عنده خبرة أكبر في الحياة وصاحب تجارب زي بوسي ابن طنط فكيهة في اشاعة حب كل ما كترت علاقاته كان احلى واحلى ولما يختارها ويسيب "هند رستم" تبأه تفوقت على نفسها وعلى غيرها وقدرت تاخد كاس العالم في خراب البيوت المستعجل، وفي المقابل البنات دول عندهم سبل كتير للرفاهية بحيث يكونوا الوقت اللطيف البعيد عن ضغوط الحياة والوقت ده  برضو مش طويل نظرا لظروف الراجل ومسئولياته فيقدروا يستحملوا القناع اللذيذ الملاك اللي معندوش مشاكل ولا متطلبات ولا أي خنقة خالص.

طب هل النوعية دي بتقتصر على البنات الصغيرين المراهقين لا للأسف في ستات متجوزة وكده وفي ستات مش متجوزة وناضجة وعلى وعي ومستوى تعليمي وثقافي عالي وكده، الحقيقة أنه أقل ما يقال عنه مرض وحيلة من حيل أبليس يدمر ويفكك بيها أي أسرة إلا من رحم ربي فمنهم اللي بتقدر ومنهم اللي بتمشي بخيبة أمل بعد ما بيقدر الزوج ده يصد ويفهم ويستوعب أنه مش مرشوش عليه سكر ولا حاجة ولو كان فعلا عليه سكر فالسكر ده هو عقله واستقراره وزوجته واولاده وحياته الهادية السعيدة وانه اول ما هياخد خطوة واحدة ناحية علاقة مش مظبوطة هيبأه ماسخ ومايع ومن غير لا سكر ولا ملح!!

الاكثر قراءة